Somos conscientes de que Compromiso por Galicia nace nun contexto social e político moi difícil e convulso. Estamos inmersos nunha brutal crise económica provocada pola des-regulación dos mercados financeiros, que fixa a axenda dunha cidadanía a cada paso máis descontenta e desencantada. A política económica europea, centrada na austeridade como fin en si mesmo, estanos a levar, certamenente, a unha situación sen saída.
Do mesmo xeito, o Goberno do Estado, efectúa de xeito indiscriminado políticas de recortes selectivos en educación, sanidade e servizos sociais que afectan ás capas máis vulnerables da sociedade. E aquí, no noso País, a sucursal presidida por Alberto Núñez Feijóo é incapaz de dar respostas aos principais problemas que afectan aos galegos e galegas: desemprego e faltan de expectativas a curto e medio prazo.
As consecuencias desta panorama son certamente desoladoras: desafección da política e dos partidos clásicos, asunción de que non existe outra política económica posible e interiorización dunha serie de valores, coa escusa da crise, que poñen en cuestión o autogoberno galego e a viabilidade do Estado de Benestar.
Ante esta situación reaccionaria, dende Compromiso por Galicia apostamos por outras forma de facer e de sentir a política. Entendemos a desafección existente na cidadanía cara os partidos tradicionais, os seus aparellos e os seus mecanismos de decisión, polo que asumimos a necesidade de que os partidos deben deixar de ser patrimonio exclusivo dos seus militantes para selo da cidadanía: de aí a nosa proposta de primarias.
Cremos noutra política económica e asumimos como necesario non só mantemento do Estado Benestar, se non o seu reforzamento e que axustes, de ter que habelos, se fagan noutros lugares. E ante o irresponsable executivo de Feijóo, propomos unha alternativa cunha base plural como a nosa que defenda o autogoberno da nosa nación como mellor ferramenta para dar resposta a un tempo de incertezas e de inacción. Sabemos que os retos son ambiciosos, pero tamén sabemos da necesidade dun proxecto que a cidadanía leva demandando moito tempo. Por e para Galicia, o noso compromiso.
Xoán Bascuas
Coordinador Xeral de Compromiso por Galicia
