O Secretario Xeral de Compromiso por Galicia, Xoán Bascuas, acompañado do tamén membro da Executiva Nacional, Paulo Carlos López, veñen de rexistrar hoxe no Parlamento galego a proposta de reforma da lei electoral que a organización galeguista presenta, “para a súa toma en consideración, discusión e aberta a calquera tipo de achega”. Con estas filosofía Bascuas quere deixar claro, que Compromiso ten o deber de estar presente “xa que tamén representamos a milleiros de galegos e de galegas que non concordan coas liñas adiantadas polo Partido Popular e que demandan propostas que vaian máis aló do eslogan, realistas, claras, contundentes e que non fuxan do centro do debate”.
Xoán Bascuas apunta que a proposta de reforma de CxG fai posible unha mellor translación da pluralidade social e política á camara, conecta coas demandas cidadás apostando por listas brancas e desbloqueadas e, ademais, aforra 14 millóns de euros por lexislatura por só os 5 millóns que pretende aforrar o Partido Popular. “Se realmente o que queren é aforrar, o mellor que pode facer o PP é meter nun caixón a súa proposta e comezar a traballar sobre a nosa”. Por non falar, indica Bascuas, “que cos datos na man, o PP quere co 45% dos votos obter o 60% do escanos, sendo isto un auténtico escándalo”.
Neste sentido, Compromiso por Galicia tamén rexistrou solicitudes de xuntanza, en primeira instancia, cos grupos parlamentarios da oposición, PSdG-PSOE, AGE e BNG, para dar a coñecer a proposta de reforma, intercambiar opinións e chegar a puntos de encontro. Para Xoán Bascuas, “máis que nunca é fundamental uns puntos mínimos sobre os cales artellar unha proposta alternativa á que pretende o Partido Popular”, e no que o papel de Compromiso por Galicia, será o de “dentro da nosa humildade, facilitar chegar a ese mínimo común denominador”.
A proposta da organización galeguista non só se cinxe a aspectos da propia lei electoral, senón que vai máis alá, constituíndo unha proposta “de máximos” con obxectivos máis ambiciosos, que tamén precisarían da reforma de Lei Orgánica 5/1985, do 19 de xuño, do Réxime Electoral Xeral ou do Estatuto de Autonomía, apunta Paulo Carlos Lopez. De igual modo a proposta de Compromiso afecta tamén á regulación das campañas nos medios de comunicación, a duración das mesmas e insiste na necesidade da implantación das listas brancas, “poñendo condicións máis duras e promovendo o endurecemento das causas de inexibilidade como cargo público”, afirma López.
